客服熱線:3610 4901

網絡KOL+職場金句王 庸材:「希望打工仔不卑不亢咁做人!」

名家書單
發佈日期:26 Apr,2017
網絡KOL+職場金句王  庸材:「希望打工仔不卑不亢咁做人!」

網絡KOL一句說話威力有幾強勁?庸材示範畀你睇,咩叫做隻隻字都識,拼埋一齊變金句後,你就會認同到五體投地。呢位唔見得光的KOL,同大家關係似遠又近,小編直接打個電話同佢傾吓計,了解佢為人多一啲。

電話一通,小編就客客氣同庸材打招呼:唔好意思,阻住你收工!

庸材:唔阻,做我哋呢行已經慣咗遲收工。(編按:正丫喂,呢個回應各行各業都啱用,仲顯得自己做事勤奮,係上進打工仔。)

小編:庸材,你點解會入行做物業管理,呢行係咪成日受上司氣?

庸材:其實,我都係誤打誤撞入行,啱啱畢業嘅時候撞正沙士,當時經濟唔好,要搵份工唔易,但聽人講做物業管理呢世人都唔駛驚畀人炒,由於小弟冇咩大志,不求發達,於是膽粗粗去見工面試,之後就順利入行。(編按:你而家係知名作家喇!)

有邊個做細嘅冇受上司氣,畀人當狗使又試過,畀人當炮灰又試過,唔係人生邊有咁多閱歷。不過…公道講句,唔係個個上司都咁乞人憎,我依家嘅老闆唔錯,所以喺呢間公司都做咗一段長時間。(編按:陰唔到你,咁都畀你兜返住…)

小編:庸材,你今次出新書係咪想發洩一下情緒?

庸材:其實呢本書都係因緣際會下寫成。有段時間,公司嘅同事成日標籤一啲新同事做事唔掂,我回想自己剛入行時,都係成日畀人鬧…公平啲講,我覺得係社會冇畀啲機會年青人,於是上網寫下工作同職場感受,估唔到會咁受歡迎。就係咁…寫寫吓,就寫得多咗一啲職場嘅事,亦希望打工仔可以不卑不亢咁做人。

小編:庸材,你放工準唔準時,要唔要OT?有時間你會唔會睇吓書?

庸材:如果唔駛同屋苑住客開會,我一般都準時收工,因為好多時候我唔走,其他同事唔敢走(小編刪咗庸材n個哈哈)。

我以前睇書會多啲,不過出嚟社會工作後,再加埋生咗個囡囡,就好少睇書…有時間,都幫個囡睇升學指南(哈哈)。(編按:好老豆好爸爸,整埋有折嘅升學天書畀你!)

小編:庸材,有無邊本書對你有好大影響,影響埋你人生個隻...

庸材:對我最大影響既書叫《當幸運來敲門》,呢本書對我好有啟發,有時候遇到啲問題解決唔到,就會諗起呢個故事….故仔我唔詳細講喇,本書帶出嘅訊息好簡單,就係每個人都唔可以固步自封,一成不變等運到,要不斷嘗試同探索,先可以搵到自己條出路同方向。(編按:識睇梗係睇呢啲,呢本係好出名寓言勵志書,成日狂呻自己被黑氣石纏身,倒不如積極克服困境,坎呵過後有艇搭啊嘛。)

小編:庸材,多謝晒呢你嘅分享,仲有無嘢想同讀者講兩句?

庸材:有呀!買多兩本《庸才當道》做記念啦!書裡面有個關於我嘅故事,親情愛情人生都有講啲,希望各位睇完之後明白到點樣去做一個人,因為時間過咗,就真係追唔返轉頭,唔好好似我咁,人生有一個解唔開嘅遺憾。

庸才當道

77.4
定價︰88
10.6

作者簡介

庸材

庸材是80後物業經理,網絡小說作家。由於庸材怕被老闆發現他於工時寫文,所以拒絕露面。然而,庸材以往曾出沒書展,並被眼利的讀者認出,有高登討論區巴打指,庸材真人頗為靚仔,拒絕露面實屬可惜。

相關優惠至2017年05月09日

最新促銷