客服熱線:3610 4901

12.12 - 12.26全店88折
購物滿299可享額外95折優惠*

SBCDEC1212

用藥是一門科學,都是一門藝術

名家書單
發佈日期:6 Oct,2017
用藥是一門科學,都是一門藝術

平時你對用藥知幾多嘢呢,有無諗過除咗乖乖聽醫生講食咩藥,其實可以行多一步,了解其他基本知識?麥志偉係個藥劑師,以「小小藥罐子」為筆名,希望用自己枝筆,好好推廣藥物教育。早前出版《用藥知多D》,務求令讀者更加掌握用藥之道。

編:點解你決定寫《用藥知多D》呢本書?

小小藥罐子:2016年4月出第一本書《藥事知多D》,主要關於常用藥物嘅基本知識,例如傷風感冒藥、腸胃藥等等。大眾可以了解多啲,去社區藥房配藥時就唔會咁迷茫。出完書,市場反應唔錯,於是出版社就有興趣再出多本姊妹作。我構思咗《用藥知多D》,教人點樣用藥。

編:可唔可以具體分享你嘅用藥之道?

小小藥罐子:主要有兩點,既係「用藥之術」、亦係「用藥之藝」。「用藥之術」指「What to take」,要知道用緊咩藥,從科學層面了解藥物,例如有咩副作用。「用藥之藝」指「How to take」,要識得用藥,用得有分寸,用得適合自己,例如唔同人唔同症狀,用藥時間同劑量都唔同。《藥事知多D》表達「用藥之術」,畀理論框架你去了解藥物;《用藥知多D》就帶出「用藥之藝」,唔同藥物喺唔同人身上有唔同發揮空間。(編按:原來用藥之道都係一門藝術~~)

編:大眾有咩常見嘅用藥謬誤?

小小藥罐子:好多人都會問「食藥係咪要飽肚食?」,答案喺睇情況而定。有部分藥物需要空肚食,例如屬四環素類的抗生素;部分藥物需要飽肚食,例如非類固醇類消炎藥。唔可以一概而論,食之前問清楚醫生或者藥劑師。

用藥知多D

定價︰88

編:你認為香港嘅藥物教育做成點?

小小藥罐子:香港嘅藥物教育仲有漫漫長路要行,市民仍然有好多用藥謬誤。我見過10個病人有9個都只係拎粒藥丸嚟藥房問藥,完全唔知道係咩藥名。即使係藥劑師,都好難單憑藥嘅外貌去判斷係咩藥。因此,大眾至少有基本概念,要認識藥名。(編按:就算唔知咩藥名,拎埋藥嘅包裝盒去藥房,等藥劑師有跡可尋喇~~)

編:你有無咩書可以推薦,等讀者了解多啲藥物教育?

小小藥罐子:未做藥劑師前,中學時代已經會睇《藥有所思》,可以作為入門書。由一班香港註冊藥劑師一齊編寫,深入淺出介紹常用藥物,令讀者明白藥物作用、副作用同禁忌等,學識正確用藥同發揮藥物最佳效果。(編按:溫馨提示~~可惜超閱網已經無存貨喇......)讀者都能物色其他書,只要啱自己讀,又吸收到藥物知識,就係好書。

編:你鐘意睇咩書?不如介紹吓~~

小小藥罐子:主要睇文史哲類嘅書,孔孟學說同古文都會睇睇。自己寫藥物文章,都會加入相關元素,令讀者多啲新鮮感。如果睇太多一本正經講藥物知識嘅書,都可能dry dry哋,希望呢種寫法會令讀者打起精神。(編按:向你哋透露下,藥罐子詩號:「東邪術,獨步走江湖。踏盡千山尋百草,仙丹靈藥在葫蘆,人間一樽壺。——《憶江南.無花譜》」,係有料到嘅!)

編:未來你有咩計劃呢?繼續寫書?

小小藥罐子:主力發展網上平台,寫Blog,想接觸到更多讀者群。希望有機會同其他機構合作,我相信愈多平台同途徑畀大眾去認識藥物,效果會愈好。出書方面,就要睇出版社安排。(編按:咁最想出版咩題材嘅書呢?)Blog入面有兩個連載系列都希望成書,分別係「藥罐子藥房事件簿」同「服藥兵法」。前者以故事形式講返喺藥房遇到咩怪人怪事,可能投入感大啲,網友反應都幾好。後者係孫子兵法X用藥之道,市面上比較少同類型嘅嘗試。我都希望多啲突破,唔好畀人定形為只寫實用書嘅作家。

編:最想同讀者講啲咩?

小小藥罐子:香港藥物教育仲需要好多時間去推廣,可能有市民會認為自己無相關醫學背景,點解要有相關知識呢?有時候有啲事情需要知,即使係業餘程度,都足夠避免好多用藥謬誤。藥物教育除咗要深入淺出外,更加要讀者願意接受知識。唔係讀醫藥嘅話,的確係難嘅,但寧願慢慢學,都唔好漠視藥物教育嘅重要性~~

作者簡介

麥志偉

麥志偉,香港中文大學藥劑學學士、英國桑德蘭大學臨床藥劑學碩士。一個小小的註冊藥劑師,希望燃燒自己渺小微弱的火光,照亮這一大片百病叢生的世界。曾經推行社區藥物教育工作,舉辦藥物教育講座,分享正確使用藥物知識。主張「服藥是一門科學,也是一門藝術」,認為「服藥是科學的細緻,也是藝術的灑脫」。

https://www.facebook.com/pegashadraymak.blogspot.hk
相關優惠至2017年10月30日

小小藥罐子讀乜書

最新促銷